ಗದಗ, ಸೆ. 02: ಜಾಗತೀಕರಣ ಮತ್ತು ಅತಿಯಾದ ತಾಂತ್ರಿಕತೆಯ ಇಂದಿನ ಸನ್ನಿವೇಶದಲ್ಲಿ ಯುವ ಪೀಳಿಗೆಯು ತನ್ನ ಮೂಲ ಬೇರುಗಳಿಂದ ದೂರವಾಗುತ್ತಿರುವ ಆತಂಕ ಎದುರಾಗಿದೆ.
ಇಂತಹ ಸಂದರ್ಭದಲ್ಲಿ ಮಕ್ಕಳಲ್ಲಿ ಸನಾತನ ಧರ್ಮದ ಉದಾತ್ತ ಮೌಲ್ಯಗಳು, ಸಾಮಾಜಿಕ ಹಾಗೂ ನೈತಿಕ ಸಂಸ್ಕಾರವನ್ನು ಬಿತ್ತುವ ಧಾರ್ಮಿಕ ಕಾರ್ಯಕ್ರಮಗಳು ಕೇವಲ ಸಾಂಪ್ರದಾಯಿಕ ಆಚರಣೆಗಳಾಗಿರದೆ, ಅವು ಇಂದಿನ ಸಮಾಜದ ತುರ್ತು ಅಗತ್ಯಗಳಾಗಿವೆ ಎಂದು ಗದಗಿನ ಸಾಮಾಜಿಕ ಕಾರ್ಯಕರ್ತ ಕೃಷ್ಣಾ ಎಚ್. ಹಡಪದ ಅವರು ಕಳಕಳಿ ವ್ಯಕ್ತಪಡಿಸಿದ್ದಾರೆ.
ಗದಗ ನಗರದ ಇತಿಹಾಸ ಪ್ರಸಿದ್ಧ ಹಾಗೂ ಕವಿ ಹರಿಹರ, ಕುಮಾರವ್ಯಾಸರ ಕರ್ಮಭೂಮಿಯಾದ ಶ್ರೀ ವೀರನಾರಾಯಣ ದೇವಸ್ಥಾನದಲ್ಲಿ ಶ್ರೀ ರಾಘವೇಂದ್ರ ಸ್ವಾಮಿಗಳ 355ನೇ ಆರಾಧನಾ ಮಹೋತ್ಸವದ ಅಂಗವಾಗಿ ಆಯೋಜಿಸಲಾಗಿದ್ದ ಮಕ್ಕಳ ಪೌರಾಣಿಕ ವೇಷಭೂಷಣ ಸ್ಪರ್ಧೆಯ ಯಶಸ್ಸನ್ನು ಶ್ಲಾಘಿಸಿ ಮಾತನಾಡಿದ ಅವರು, ಕಾರ್ಯಕ್ರಮದಲ್ಲಿ ಪುಟಾಣಿ ಮಕ್ಕಳು ಧರಿಸಿದ್ದ ವೈವಿಧ್ಯಮಯ ವೇಷಭೂಷಣಗಳು ಪ್ರೇಕ್ಷಕರಲ್ಲಿ ಭಕ್ತಿಯ ಪರಾಕಾಷ್ಠೆಯನ್ನು ಉಂಟುಮಾಡಿದವು ಎಂದರು.
ಶಬರಿಯ ಸತ್ವಯುತ ಪಾತ್ರದಲ್ಲಿ ಶಕ್ತಿ ಸೋಳಂಕಿ ಹಾಗೂ ಮರ್ಯಾದಾ ಪುರುಷೋತ್ತಮ ಶ್ರೀರಾಮನ ಪಾತ್ರದಲ್ಲಿ ಆದ್ಯ ಚಿತುರಿ ಅವರು ತೋರಿದ ನಯನಮನೋಹರ ಅಭಿನಯವು ಕೇವಲ ಪೌರಾಣಿಕ ಮರುಸೃಷ್ಟಿಯಾಗಿರಲಿಲ್ಲ.
ಬದಲಿಗೆ ನಮ್ಮ ಇತಿಹಾಸದ ಶ್ರೇಷ್ಠ ಆದರ್ಶಗಳನ್ನು ಇಂದಿನ ಪೀಳಿಗೆಗೆ ದಾಟಿಸುವ ಸತ್ಪ್ರಯತ್ನವಾಗಿತ್ತು. ಇಂತಹ ಪಾತ್ರಗಳು ಮಕ್ಕಳ ಸುಪ್ತ ಮನಸ್ಸಿನಲ್ಲಿ ಧರ್ಮದ ರಕ್ಷಣೆ, ಪಾಲನೆ ಹಾಗೂ ಸಮಾಜ ಮತ್ತು ದೇಶದ ಮೇಲಿನ ಪ್ರೀತಿಯನ್ನು ಮೂಡಿಸಲು ಸಹಕಾರಿಯಾಗುತ್ತವೆ ಎಂದರು.
ಇಂದಿನ ಶಿಕ್ಷಣ ಪದ್ಧತಿಯು ಅಂಕ ಗಳಿಕೆಗೆ ಸೀಮಿತವಾಗುತ್ತಿದ್ದು, ಮೌಲ್ಯಾಧಾರಿತ ಜೀವನಶೈಲಿಯ ಕೊರತೆ ಎದ್ದು ಕಾಣುತ್ತಿದೆ. ಮಕ್ಕಳಲ್ಲಿ ಸಣ್ಣ ವಯಸ್ಸಿನಲ್ಲೇ ‘ನಯ-ನುಡಿ’ (ಸೌಮ್ಯ ಮಾತುಗಾರಿಕೆ), ರಾಷ್ಟ್ರದ ಮೇಲಿನ ದೇಶಭಕ್ತಿ ಹಾಗೂ ಶಿಸ್ತಿನ ಜೀವನದ ಆಚಾರ-ವಿಚಾರಗಳನ್ನು ಬೆಳೆಸದಿದ್ದರೆ ಸ್ವಸ್ಥ ಸಮಾಜ ಮತ್ತು ಬಲಿಷ್ಠ ದೇಶದ ನಿರ್ಮಾಣ ಅಸಾಧ್ಯ ಎಂದು ಅಭಿಪ್ರಾಯಪಟ್ಟರು.
ಧರ್ಮ ಎಂದರೆ ಕೇವಲ ಪೂಜಾ ವಿಧಿವಿಧಾನಗಳಲ್ಲ; ಅದು ದೇಶಪ್ರೇಮದೊಂದಿಗೆ ಬದುಕುವ ದಾರಿ. ಈ ನಿಟ್ಟಿನಲ್ಲಿ ಮಕ್ಕಳಲ್ಲಿ ಸಾಂಸ್ಕೃತಿಕ, ನೈತಿಕ ಹಾಗೂ ರಾಷ್ಟ್ರೀಯ ಪ್ರಜ್ಞೆಯನ್ನು ಬಡಿದೆಬ್ಬಿಸುವ ಇಂತಹ ಜಾಗೃತಿ ಕಾರ್ಯಕ್ರಮಗಳು ಕೇವಲ ನಗರ ಪ್ರದೇಶಗಳಿಗೆ ಸೀಮಿತವಾಗದೆ
, ಗ್ರಾಮೀಣ ಮಟ್ಟದಲ್ಲೂ ವ್ಯಾಪಕವಾಗಿ ಆಯೋಜನೆಗೊಳ್ಳಬೇಕು ಎಂದು ಕೃಷ್ಣಾ ಎಚ್. ಹಡಪದ ಅವರು ಪ್ರಕಟಣೆಯಲ್ಲಿ ಕರೆ ನೀಡಿದರು.
About the Author
