ಗದಗ: ನಗರದ ಸ್ವಚ್ಛತೆ ಕಾಪಾಡಬೇಕಾದ ಗದಗ ನಗರಸಭೆಯ ಕಸ ವಿಲೇವಾರಿ ವ್ಯವಸ್ಥೆಯೇ ಇದೀಗ ಸಾರ್ವಜನಿಕರ ಪ್ರಶ್ನೆಗೆ ಗುರಿಯಾಗಿದೆ. ಮನೆ-ಮನೆಗಳಿಂದ ಕಸ ಸಂಗ್ರಹಿಸಲು ನಿಯಮಿತವಾಗಿ ಹಾಗೂ ನಿಗದಿತ ಸಮಯಕ್ಕೆ ವಾಹನಗಳು ಬಾರದಿರುವ ಆರೋಪಗಳ ನಡುವೆ, ಕಸ ಸಾಗಿಸುವ ವಾಹನಗಳ ಸ್ಥಿತಿಯೂ ಸಾರ್ವಜನಿಕರಲ್ಲಿ ಅಸಮಾಧಾನಕ್ಕೆ ಕಾರಣವಾಗಿದೆ
.ನಗರದ ವಿವಿಧ ಪ್ರದೇಶಗಳಲ್ಲಿ ಕಸ ಸಂಗ್ರಹಿಸುವ ವಾಹನಗಳು ಸರಿಯಾದ ಸಮಯಕ್ಕೆ ಆಗಮಿಸುತ್ತಿಲ್ಲ ಎಂಬ ದೂರುಗಳು ಕೇಳಿಬರುತ್ತಿವೆ. ಇದರಿಂದ ಸಾರ್ವಜನಿಕರು ಕಸವನ್ನು ರಸ್ತೆ ಬದಿ, ಖಾಲಿ ಜಾಗ ಅಥವಾ ಇತರೆ ಸ್ಥಳಗಳಲ್ಲಿ ಹಾಕುವ ಪರಿಸ್ಥಿತಿ ನಿರ್ಮಾಣವಾಗುತ್ತಿದೆ ಎಂಬ ಆರೋಪವಿದೆ.
ಪರಿಣಾಮವಾಗಿ ಸ್ವಚ್ಛತೆ ಕಾಪಾಡುವ ಉದ್ದೇಶವೇ ಪ್ರಶ್ನಾರ್ಥಕವಾಗುತ್ತಿದೆ.ಇದರ ಮತ್ತೊಂದು ಗಂಭೀರ ಅಂಶವೆಂದರೆ, ಕಸ ಸಾಗಿಸುವ ಕೆಲವು ವಾಹನಗಳಲ್ಲಿ ಕಸವನ್ನು ಸಂಪೂರ್ಣವಾಗಿ ಮುಚ್ಚುವ ವ್ಯವಸ್ಥೆ ಇಲ್ಲದಿರುವುದು. ತೆರೆದ ವಾಹನಗಳಲ್ಲಿ ಕಸ ತುಂಬಿಕೊಂಡು ರಸ್ತೆಗಳಲ್ಲಿ ಸಂಚರಿಸುವಾಗ, ಗಾಳಿ ಬೀಸಿದ ಸಂದರ್ಭದಲ್ಲಿ ಕಸದ ತುಣುಕುಗಳು ಹಾಗೂ ಧೂಳು ರಸ್ತೆಯ ಮೇಲೆ ಮತ್ತು ಸಂಚರಿಸುವ ವಾಹನಗಳ ಮೇಲೆ ಬೀಳುತ್ತಿರುವ ಬಗ್ಗೆ ಸಾರ್ವಜನಿಕರು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ
.ಕಸ ಸಾಗಿಸುವ ವಾಹನವು ರಸ್ತೆಯಲ್ಲಿ ಸಂಚರಿಸುವ ಸಂದರ್ಭದಲ್ಲಿ ಅದರ ಹಿಂದೆ ಹಾಗೂ ಅಕ್ಕಪಕ್ಕದಲ್ಲಿ ಬರುತ್ತಿರುವ ದ್ವಿಚಕ್ರ ವಾಹನಗಳು ಮತ್ತು ಕಾರುಗಳ ಮೇಲೆ ಕಸದ ಕಣಗಳು, ಧೂಳು ಬೀಳುವ ಪರಿಸ್ಥಿತಿ ಎದುರಾಗುತ್ತಿದೆ ಎಂಬ ಆರೋಪ ಕೇಳಿಬಂದಿದೆ. ನಗರವನ್ನು ಸ್ವಚ್ಛವಾಗಿಡಬೇಕಾದ ಕಸ ವಿಲೇವಾರಿ ವಾಹನವೇ ಸಾರ್ವಜನಿಕರ ಸಂಚಾರಕ್ಕೆ ಕಸ ಮತ್ತು ಧೂಳಿನ ಸಮಸ್ಯೆ ಸೃಷ್ಟಿಸಿದರೆ ಹೊಣೆಗಾರರು ಯಾರು? ಎಂಬ ಪ್ರಶ್ನೆ ಇದೀಗ ಸಾರ್ವಜನಿಕ ವಲಯದಲ್ಲಿ ಕೇಳಿಬರುತ್ತಿದೆ
.ಸ್ವಚ್ಛತೆಗಾಗಿ ವಾಹನವೇ? ಸಮಸ್ಯೆಗಾಗಿ ವಾಹನವೇ?ಕಸ ಸಂಗ್ರಹಿಸುವುದು ಮಾತ್ರವಲ್ಲದೆ, ಅದನ್ನು ಸುರಕ್ಷಿತವಾಗಿ ಸಾಗಿಸುವುದು ಕೂಡ ಕಸ ವಿಲೇವಾರಿ ವ್ಯವಸ್ಥೆಯ ಪ್ರಮುಖ ಭಾಗವಾಗಿದೆ
. ಕಸ ಸಾಗಿಸುವ ವೇಳೆ ರಸ್ತೆಗೆ ಕಸ ಬೀಳದಂತೆ ಹಾಗೂ ಸಾರ್ವಜನಿಕರಿಗೆ ತೊಂದರೆಯಾಗದಂತೆ ಸೂಕ್ತ ಮುಚ್ಚಳ ಅಥವಾ ಕವರ್ ವ್ಯವಸ್ಥೆ ಕಲ್ಪಿಸುವುದು ಅಗತ್ಯವಾಗಿದೆ.ಆದರೆ ವಾಹನಗಳ ನಿರ್ವಹಣೆ, ಕಸ ಸಾಗಿಸುವ ವಿಧಾನ ಮತ್ತು ಸಮಯ ಪಾಲನೆಯ ಬಗ್ಗೆ ಸಾರ್ವಜನಿಕರಿಂದ ನಿರಂತರವಾಗಿ ದೂರುಗಳು ಕೇಳಿಬಂದರೂ ಸಂಬಂಧಪಟ್ಟ ಅಧಿಕಾರಿಗಳು ಈ ಬಗ್ಗೆ ಯಾವ ಕ್ರಮ ಕೈಗೊಂಡಿದ್ದಾರೆ ಎಂಬುದು ಸ್ಪಷ್ಟವಾಗಬೇಕಿದೆ.
ನಗರಸಭೆ ಉತ್ತರಿಸಬೇಕಾದ ಪ್ರಶ್ನೆಗಳುಕಸ ವಿಲೇವಾರಿ ವಾಹನಗಳಿಗೆ ನಿಗದಿತ ಸಂಚಾರ ವೇಳಾಪಟ್ಟಿ ಇದೆಯೇ? ಇದ್ದರೆ ಅದು ಕಟ್ಟುನಿಟ್ಟಾಗಿ ಪಾಲನೆಯಾಗುತ್ತಿದೆಯೇ? ಕಸ ಸಾಗಿಸುವ ವಾಹನಗಳಿಗೆ ಕವರ್ ಅಥವಾ ಮುಚ್ಚಳ ವ್ಯವಸ್ಥೆ ಕಡ್ಡಾಯಗೊಳಿಸಲಾಗಿದೆಯೇ?
ನಿಯಮ ಉಲ್ಲಂಘಿಸಿ ತೆರೆದ ವಾಹನದಲ್ಲಿ ಕಸ ಸಾಗಿಸಿದರೆ ಗುತ್ತಿಗೆದಾರರು ಅಥವಾ ಸಂಬಂಧಪಟ್ಟ ಸಿಬ್ಬಂದಿಯ ವಿರುದ್ಧ ಯಾವ ಕ್ರಮ ಕೈಗೊಳ್ಳಲಾಗುತ್ತದೆ? ವಾಹನಗಳ ನಿರ್ವಹಣೆ ಮತ್ತು ಸ್ವಚ್ಛತಾ ಕಾರ್ಯದ ಮೇಲ್ವಿಚಾರಣೆಯನ್ನು ಯಾರು ಮಾಡುತ್ತಿದ್ದಾರೆ?ನಗರಸಭೆಯ ವ್ಯಾಪ್ತಿಯಲ್ಲಿ ಸ್ವಚ್ಛತೆ ಹೆಸರಿನಲ್ಲಿ ನಡೆಯುತ್ತಿರುವ ಕಸ ವಿಲೇವಾರಿ ವ್ಯವಸ್ಥೆ ನಿಜವಾಗಿಯೂ ನಿಯಮಾನುಸಾರ ನಡೆಯುತ್ತಿದೆಯೇ?
ಅಥವಾ ಕೇವಲ ದಾಖಲೆಗಳಲ್ಲೇ ವ್ಯವಸ್ಥೆ ಸರಿಯಾಗಿದೆಯೇ? ಎಂಬುದನ್ನು ಗದಗ ನಗರಸಭೆ ಸ್ಪಷ್ಟಪಡಿಸಬೇಕಿದೆ.ಸಾರ್ವಜನಿಕರಿಂದ ಬರುತ್ತಿರುವ ದೂರುಗಳಿಗೆ ಸ್ಪಂದಿಸಿ, ಕಸ ಸಂಗ್ರಹಣೆಗೆ ನಿಗದಿತ ಸಮಯ ಪಾಲನೆ, ಸುರಕ್ಷಿತ ಕಸ ಸಾಗಣೆ ಹಾಗೂ ವಾಹನಗಳ ಸಮರ್ಪಕ ನಿರ್ವಹಣೆಗೆ ನಗರಸಭೆ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಬೇಕಿದೆ
. ನಗರ ಸ್ವಚ್ಛವಾಗಬೇಕಾದರೆ ಕಸ ವಿಲೇವಾರಿ ವ್ಯವಸ್ಥೆಯೂ ವ್ಯವಸ್ಥಿತವಾಗಿರಬೇಕು.
About the Author
