ಕಲಬುರಗಿ: ಪೊಲೀಸರನ್ನು ಕಂಡು ಅಪರಾಧಿಗಳು ಕಾನೂನಿನ ಭಯ ಹೊಂದಿರಬೇಕು. ಆದರೆ ಇದೀಗ ಪೊಲೀಸರೇ ರೌಡಿಶೀಟರ್‌ಗೆ ಆತಿಥ್ಯ ನೀಡಿದರೆ ಹೇಗೆ? ಎಂಬ ಪ್ರಶ್ನೆ ಕಲಬುರಗಿ ಜಿಲ್ಲೆಯ ಗಾಣಗಾಪುರದಲ್ಲಿ ಕೇಳಿಬರುತ್ತಿದೆ.
ಗಾಣಗಾಪುರ ಪೊಲೀಸ್ ಠಾಣೆಯ PSI ಸಂಗೀತಾ ಅವರು ರೌಡಿಶೀಟರ್ ಎಂದು ಗುರುತಿಸಲಾಗಿರುವ ಮಾರುತಿ ಎಂಬಾತನಿಗೆ ಠಾಣೆಯಲ್ಲೇ ಸನ್ಮಾನ ಮಾಡಿದ್ದಾರೆ ಎನ್ನಲಾದ ಫೋಟೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಸಾರ್ವಜನಿಕ ವಲಯದಲ್ಲಿ ತೀವ್ರ ಚರ್ಚೆಗೆ ಕಾರಣವಾಗಿದೆ.
ಠಾಣೆಯಲ್ಲೇ ಸನ್ಮಾನ?
ವೈರಲ್ ಆಗಿರುವ ಫೋಟೋದಲ್ಲಿ PSI ಸಂಗೀತಾ ಅವರು ಮಾರುತಿಗೆ ಸನ್ಮಾನ ಮಾಡುತ್ತಿರುವುದು ಕಂಡುಬರುತ್ತದೆ ಎನ್ನಲಾಗಿದೆ. ರೌಡಿಶೀಟರ್‌ಗಳ ಮೇಲೆ ಪೊಲೀಸ್ ಇಲಾಖೆ ನಿಗಾ ಇಡಬೇಕಾದ ಸಂದರ್ಭದಲ್ಲಿ, ಪೊಲೀಸ್ ಠಾಣೆಯಲ್ಲೇ ಅವರಿಗೆ ಗೌರವ ನೀಡಿರುವುದು ಏಕೆ? ಎಂಬ ಪ್ರಶ್ನೆ ಇದೀಗ ಸಾರ್ವಜನಿಕರಿಂದ ಕೇಳಿಬರುತ್ತಿದೆ.
ಇಷ್ಟೇ ಅಲ್ಲದೆ, ಮಾರುತಿ ಭಾಗವಹಿಸಿದ್ದ ಎನ್ನಲಾದ ಹುಟ್ಟುಹಬ್ಬದ ಕಾರ್ಯಕ್ರಮದಲ್ಲಿಯೂ PSI ಭಾಗಿಯಾಗಿದ್ದರು ಎಂಬ ಆರೋಪ ಕೇಳಿಬಂದಿದೆ.ಪೊಲೀಸರ ಕಾರ್ಯಕ್ರಮದಲ್ಲೂ ರೌಡಿಶೀಟರ್?
ಮತ್ತೊಂದೆಡೆ, ಪೊಲೀಸರ ವತಿಯಿಂದ ಆಯೋಜಿಸಲಾಗಿದ್ದ ‘ಏಕರ್ ಓಟ’ ಕಾರ್ಯಕ್ರಮದಲ್ಲಿಯೂ ಇದೇ ರೌಡಿಶೀಟರ್ ಭಾಗಿಯಾಗಿದ್ದಾನೆ ಎನ್ನಲಾಗಿದ್ದು, ಈ ವಿಚಾರವೂ ಸಾರ್ವಜನಿಕರ ಗಮನ ಸೆಳೆದಿದೆ.
ರೌಡಿಶೀಟರ್‌ಗಳ ಚಟುವಟಿಕೆಗಳ ಮೇಲೆ ನಿಗಾ ವಹಿಸಬೇಕಾದ ಪೊಲೀಸರು ಅವರೊಂದಿಗೆ ಇಂತಹ ಆತ್ಮೀಯತೆ ಹೊಂದಿರುವುದು ಸರಿಯೇ? ಪೊಲೀಸ್ ಇಲಾಖೆ ಇದಕ್ಕೆ ಯಾವ ರೀತಿಯ ನಿಯಮಾವಳಿ ಹೊಂದಿದೆ? ಎಂಬ ಪ್ರಶ್ನೆಗಳು ಎದ್ದಿವೆ.“ಕಾನೂನಿನ ಭಯ ಎಲ್ಲಿದೆ?
”“ಪೊಲೀಸರನ್ನು ಕಂಡು ರೌಡಿಗಳು ಭಯಪಡಬೇಕೇ ಹೊರತು, ಪೊಲೀಸರೇ ರೌಡಿಶೀಟರ್‌ಗಳಿಗೆ ಗೌರವ ನೀಡುವಂತಾದರೆ ಕಾನೂನಿನ ಭಯ ಉಳಿಯುತ್ತದೆಯೇ?”
ಎಂದು ಸಾರ್ವಜನಿಕರು ಪ್ರಶ್ನಿಸುತ್ತಿದ್ದಾರೆ.ಗೃಹ ಸಚಿವ ಪ್ರಿಯಾಂಕ್ ಖರ್ಗೆ ಅವರ ತವರು ಜಿಲ್ಲೆಯಲ್ಲಿ ಇಂತಹ ಘಟನೆಗಳು ನಡೆಯುತ್ತಿರುವುದು ಸರಿಯಲ್ಲ ಎಂದು ಕೆಲವರು ಆಕ್ರೋಶ ವ್ಯಕ್ತಪಡಿಸಿದ್ದು, ಪ್ರಕರಣದ ಕುರಿತು ಹಿರಿಯ ಪೊಲೀಸ್ ಅಧಿಕಾರಿಗಳು ಸ್ಪಷ್ಟನೆ ನೀಡಬೇಕು ಎಂದು ಆಗ್ರಹಿಸಿದ್ದಾರೆ.
ಹಿರಿಯ ಅಧಿಕಾರಿಗಳಿಂದ ತನಿಖೆಗೆ ಒತ್ತಾಯವೈರಲ್ ಆಗಿರುವ ಫೋಟೋ ಹಾಗೂ ಕೇಳಿಬರುತ್ತಿರುವ ಆರೋಪಗಳ ಕುರಿತು ಕಲಬುರಗಿ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಗಳು ಸಮಗ್ರವಾಗಿ ಪರಿಶೀಲನೆ ನಡೆಸಬೇಕು ಎಂಬ ಒತ್ತಾಯ ಕೇಳಿಬರುತ್ತಿದೆ.
ರೌಡಿಶೀಟರ್‌ಗೆ ಠಾಣೆಯಲ್ಲಿ ಸನ್ಮಾನ ನಡೆದಿದೆಯೇ? ಹುಟ್ಟುಹಬ್ಬದ ಕಾರ್ಯಕ್ರಮದಲ್ಲಿ PSI ಭಾಗವಹಿಸಿದ್ದರೇ? ಪೊಲೀಸ್ ಇಲಾಖೆಯ ಕಾರ್ಯಕ್ರಮದಲ್ಲಿ ರೌಡಿಶೀಟರ್ ಹೇಗೆ ಭಾಗವಹಿಸಿದರು? ಎಂಬ ಪ್ರಶ್ನೆಗಳಿಗೆ ಇಲಾಖೆಯಿಂದ ಅಧಿಕೃತ ಸ್ಪಷ್ಟನೆ ಹೊರಬಂದರೆ ಮಾತ್ರ ವಾಸ್ತವಾಂಶ ಸ್ಪಷ್ಟವಾಗಲಿದೆ
.ಸನ್ಮಾನ ಮತ್ತು ಆತಿಥ್ಯದ ಹಿಂದೆ ಯಾವುದೇ ನಿಯಮಬದ್ಧ ಕಾರಣವಿದ್ದರೆ ಪೊಲೀಸ್ ಇಲಾಖೆ ಅದನ್ನು ಬಹಿರಂಗಪಡಿಸಬೇಕು. ಇಲ್ಲವಾದಲ್ಲಿ ತಪ್ಪಿತಸ್ಥರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂಬುದು ಸಾರ್ವಜನಿಕರ ಒತ್ತಾಯವಾಗಿದೆ.
About the Author
